Nasikop nga nakalapas sa health protocols nisaka

CEBU, Philippines — Misaka og 25 percent ang mga nadakpan gumikan sa paglapas sa health protocol nonot sa pagpaubos sa Siyudad sa Sugbo sa Modified Enhanced Community Quarantine MECQ.

Kini base sa datus nga gipagawas sa kapolisan tulo ka adlaw human gipatuman ang bag-ong quarantine status.

Suma pa ni Cebu City Police Office Director Colonel Josefino Ligan ,gikan sa July 29 hangtod sa 31 moabot sa 312 ka tawo ang ilang nadakpan sa lain-laing kalapasan sama sa curfew, wala magsul-ob og facemask ug liquor ban ug sa 312 nga nadakpan 47 ka mga menor de edad ilang na-rescue.

Sa August 1 hangtod sa 3 nga MECQ period niabot sa 400 ka tawo ang ilang nadakpan ug 44 niini mga menor de edad.

Apan bisan og daghan ang mga violators way plano si acting mayor Rama nga ibalik ang pagpatuman sa quarantine pass tungod kay wala’y lockdown nga nahitabo.

Sa laing bahin hugot nga gipatuman sa Cebu City Transportation Office CCTO ang 75 percent nga kapasidad sa mga pampublikong sakyanan subay sa mando sa IATF.

Lakip sa mando angayan nga sundon sa mga Modern Jeep ang pag-abli sa pultahan ug bintana, samtang mga taxi kinahanglan usab mag abli sa ilang bintana.

Ang mga pasahero kinahanglan kanunay usab nga mag sul-ob og facemask, faceshield,ug pagdala sa ilang valid ID ug uban mga documents nga posibleng pangitaon.

Samtang kapin sa 100 ka mga pampublikong sakyanan ang nasikop sa Traffic Enforcement Agency of Mandaue (TEAM) sukad sa Agosto 1, 2021 gumikan sa kalapasan sa mga driver sa minimum health protocols ug overloading.

Suma pa ni Edwin Jumao-as executive director sa TEAM nga niadtong una nilang operasyon ilang nadakpan ang 35 ka mga driver sa PUV , sa ikaduhang adlaw laing 50 ka  driver ang ilang nadakpan ug laing 25  pa usab sa ikatulong adlaw nga pagpatuman niini. —Romeo T.  Limpangog/ Dale Rose Ostria/MEL (BANATNEWS)