Johnson and Johnson gitinguha nga ibakuna sa A2 ug A3 category
CEBU, Philippines — Malaumon si Dr. Jeffrey Ibones, Officer-in-Charge sa Cebu City Health Department nga kun mahimo magamit ang Johnson and Johnson vaccine sa mga tawo ubos sa A2 ug A3 Category nga gustong magpabakuna.
Si Ibones mipadangat sa ilang hangyo bahin niini ngadto kang acting mayor Michael Rama aron mapaabot kini ngadto sa IATF.
Nasayran nga duna pay nahibilin nga 5,000 doses sa Johnson and Johnson vaccine sa Cebu City apan gitagana kini sa mga senior citizens sa rason nga daghan pang senior citizens ang wala nabakunahan.
Sa datos sa City Health Department naa na sa dul-an 30,000 ka mga senior citizens sa siyudad ang nabakunahan ug nanghinaot si Dr. Ibones nga mosaka pa kini.
“Nakita nato gani sa Ayala daghan kaayo nag-walk in pero atong gipasabot nga no walk-in lang sa ta, pero kato gihapon kung naay dili motunga nga senior ato lang pulihan pero gi-discourage gyud nato ang walk-in kay maluoy ta sa senior nga mag-walk in but katong ni-adto sa atua nga nag-wheelchair, maglisod gyud intawon ato lang gi-accommodate”, ni Dr. Ibones pa.
Gawas sa Johnson and Johnson vaccines, duna pa’y nabilin nga 4,000 doses sa Sinovac vaccine ang Cebu City alang kini sa first dose apan matod pa karong adlawa dugang supply sa bakuna ang maabot sa siyudad.
Gumikan kay nagkadaghan naman ang gustong magpabakuna kontra COVID-19 si Dr. Ibones miingon nga kadtong mga vaccination sites sa dakbayan nga nag-cater og second dose wala nila butangi og first dose tungod kay daghan ang nagpabakuna alang sa second dose.
Niabot na sab sa 63,000 ang fully vaccinated ug naa sa 120,000 ang nakadawat na sa ilang first dose sa COVID-19 vaccine, wala pay labot niini ang datos sa vaccination nga gihimo sa Project Balik Buhay. MEL (BANATNEWS)
- Latest
