OPD sa CCMC pabutanga’g COVID-19 beds

CEBU, Philippines — Gihulagway ni Yvonne Caña, Cebu City Medical Center Administrator nga puno ang kahimtang sa Cebu City Medical Center(CCMC) karon apan giplanuhan nila nga ang Outpatient Department sa karaan nga CCMC butangan og 12 beds isip extention sa isolation facility nila nga dunay 20 beds.

Sigon ni Caña ang paagi karon sa CCMC mao nga ang mga pasyente nga grabe anha sa ila dad-on apan kun moarang-arang na gani ilang kahimtang ibalhin sila sa Cebu City Quarantine Center(CCQC) unya ug dunay grabe sa CCQC mao ni ipuli didto sa CCMC.

Sa pagkakaron naa sa 20 COVID patients ang giatiman sa CCMC ug naa sa 120 ka pasyente sa CCQC nga dunay mild to moderate symptoms.

Giangkon ni Caña kuwang gyud ilang nurses karon ilabi na nga duna sab sila’y gi-assign nga mga nurses sa CCQC hinungdan nga nihangyo sila sa Cebu City Government nga mahatagan sila og dugang tawo.

“So karon on-going ang interview sa atong 100 nurses. That’s for the CCQC and CCMC. Ang sweldo nato sa atong nurses consider na siya as  nurse II P33,550 something ingon ana,” ni Caña pa.

Kun casual employee ang nurse gawas sa sweldo nga ilang madawat duna sab sila’y laing benefits ug hazard pay.

Nagplano ang Cebu City Government nga mag-hire og 200 ka nurses aron duna say ma-augment nga mga medical personnel sa mga pribadong tambalanan.

Matod ni Dr. Anton Oliver Reposar II, Medical Director sa CCMC gumikan naaprubahan naman ang budget alang sa augment sa mga personnel kadtong mga nurses ug uban pa mahimong mo-apply sa City Government ug dawaton isip Job Order employee.

Gikinahanglan gyud matod pa ang mga dugang medical personnel karon ilabi na nga nagkasaka ang kaso sa COVID-19 sa Cebu City.

“We encourage them to apply sa City Government para ma-hire para among mabutang didto sa gi-mention ni Maam Yvonne ganeha sa Cebu City Quarantine Center ug sa Cebu City Medical Center…Included na sad na siya nga mag-hire og additional Doctors sa Cebu City Quarantine Center para sa atong expansion kay mo-increase man ta og beds didto sa Cebu City Quarantine Center,” ni Dr. Reposar II pa.

Sa kasamtangan ang CCQC dunay 160 beds ug giplanuhan nga i-expand kini ngadto sa 250 hantod na sa 300 beds isip pagpangandam sa nagkasaka nga COVID cases sa Cebu City.

Gibisita sab ni Rama ang pipila ka mga private ug public hospitals sa siyudad sa Sugbo aron makita gyud niya ang tinud-anay nga sitwasyon ug ipakita sa mga Sugboanon nga ang siyudad naningkamot nga sa pagbuhat sa mga angayan nga buhaton human niadtong adlaw nga Domingo dunay 33 ka pasyenteng napugos pagpundo sa gawas nga bahin sa usa ka pribadong tambalanan samtang naghuwat nga ma-admit.— IBM (BANATNEWS)