Ginang maoy giluba sa kaaway sa bana

CEBU, Philippines — Naangol ang usa ka ginang human kini maoy gipahimungtan og dunggab sa kaaway sa iyang bana diha sa sud sa ilang balay  sa Sitio Tapon, Barangay Poblacion 3, sa Dakbayan sa Carcar kagahapong adlawa. Ang biktima mao si Maria Malinda, 54,  samtang ang suspek mao ang ilang silingang si Diosdado Quines Unabia,60.

Sumala pa sa kapolisan, samtang naglakaw pauli ang suspek nga si Unabia nalabyan niini ang pundok sa bana sa biktima nga si Melvin Lawas nag-inom.

Giingong gihunongan kini sa suspek ug gikomprontase bahin sa ilang bikil kaniadto, apan niresulta kini sa sinukmagay sa duha.

Ang suspek mipauli sa ilaha ug giingong nagkuha og kutsilyo ug gisulong ang balay ni Unabia, apan wala kini didto. Ang biktima maoy nakigatubang kaniya nga nisangpot sab sa mainitong panaglalis.

Dihadiha giingong gidunggab sa suspek ang ginang sa makadaghang higayon sa nagkadaiyang bahin sa lawas ug dayong sibat.

Ang biktima gidala sa Cebu Provincial Hospital-Carcar City samtang ang suspek nadakpan dayon sa kapolisan. —IBM (BANATNEWS)