Asawa nga nagkanta-kanta gipusil patay sa bana

CEBU, Philippines — Patay ang usa ka 47-anyos nga asawa human kini pusila sa iyang bana niadtong Martes sa gabii diha sulod sa ilang panimalay sa Barangay Sambag 1, Dakbayan sa Sugbo.

Ang biktima mao si Marlyn Baya, trabahante sa city social worker sa Barangay Labangon.

Ang suspetsado mao si Galo Baya, usa ka kanhi security guard natingkagol karon diha sa detention cell sa Abellana Police Station.

Ang kapolisan wala pa kini impormasyon sa motibo sa pagpatay sa biktima tungod kay ang suspetsado giingong tulibagbag ang tinubagan niini.

Base sa imbestigasyon sa kapolisan nga ang suspetsado giingong nipaubos sa brain aneurysm operation tulo ka tuig ang nilabay ug gituohan nga naapektahan ang pangisip niini ug kusog na usab maghunahuna sa mga nangagi nga insidente.

Sa pakighinabi sa kapolisan kang Galo nagkanayon kini nga gibalewala siya sa iyang asawa tungod sa ka busy niini sa iyang trabaho ug sa kalingawan nga kanta-kanta.

Sa wala pa ang insidente sa pagpamusil, mga alas 8:00 sa gabii naghupot ang biktima sa iyang cellphone ug earphones nga nagkanta-kanta apan kalit kining gipusil sa iyang bana. Ang biktima nakaangkon kini og samad pinusilan sa iyang dughan ug tiyan nga gituohang hinungdan sa kamatayon niini.

Ang suspetsado nigamit sa iyang kalibre .38 nga revolver nga service firearm niini kaniadto dihang nagrabaho pa kini isip security guard.

Giingong ang maong armas gitago kini sa suspetsado isip proteksiyon.

Ang anak sa magtiayon kinsa niadtong higayona diha sa ikaduhang andana sa ilang balay nagkanayon nga wala siya nakabantay nga nag-away ang iyang mga ginikanan apan kalit lang siyang nakadungog og buto sa armas.— BDB (BANATNEWS)