Mga sari-sari store gipasidan-an sa EOC

Cebu, Philippines — Gipasidan-an sa Cebu City Emergency Operations Center (EOC) ang mga tag-iya og sari-sari store nga dili magpainom og ilimnong makahubog sa ilang mga area.

Matud sa hepe sa EOC nga si Konsehal Joel Garganera nga dili sila magduha-duha sa pagpadala og show cause order niini kon ilaha kining masakpan nga magpainom.

Mohimo sila og subsob nga pag-monitor alang sa maong butang.

“Mohimo gyud ta og mga operasyon niana, kon masakpan gani ato gyud na sila padalhan og show cause order”, pasidaan ni Garganera.

Ug kon ugaling mopalit og ilimnon diha sa sari-sari store kinahanglan nga adto kini imnon sa balay tumong niini nga malikayan ang mga tapok-tapok.

Panghinaot ni Garganera nga motuman sa maong lagda ang mga tag-iya og sari-sari store. Dugang ni Garganera nga importante kaayo ang kooperasyon sa katawhan ilabi na karon nga nagsaka ang kaso sa COVID-19 sa Siyudad sa Sugbo. (BANAT NEWS)