Lalaki sikop tungod sa shabu

Cebu, Philippines — Usa ka 36-anyos nga lalaki ang nasikop human nasakmitan og ginadili nga drugas diha sa Barangay Bulacao sa Dakbayan sa Talisay niadtong Huwebes sa hapon.

Ang nasikop mao si Job Unabia, residente sa maong lugar. Nangulo sa maong operasyon mao ang Provincial Intelligence Unit sa Cebu Provincial Police Office uban sa mga operatiba sa Talisay City Police Office, Provincial Force Mobile Company, ug Provincial Drug Enforcement Unit.

Nasakmit kang Unabia, ang 50 gramos nga gituohang shabu nga mobalor og P340 mil base sa Dangerous Drug Board Value ug buy bust money.

Ang dinakpan wala mohatag og pamahayag dihang gipangutana sa mga tigbalita.—Rowena D. Capistrano/IBM

Mga balay sa Talisay gibanlas sa bawod

Pipila na ka mga panimay nga naa daplin sa dagat ang nangaguba gumikan sa dagkong bawod sa dagat dala niining nasinating dautang panahon nga gipasamot sa hanging habagat.

Si Alvin Santillana, pangu sa City Disaster Risk Reduction and Management Office miawhag sa mga nagpuyo daplin sa baybayon nga dili mokumpiyansa ug mohiklin dayon sa mas luwas nga dapit kun sa ilang tan-aw dunay peligro.

Asoy pa niya nga likayan sa una ang dagat karon tungod sa kabati sa panahon karon. Padayon pa nga gisusi kung pila ka balay ang naapektahan.

Niadtong Huwebes sa hapon nangatumba ang mga dagkong kahoy sa pipila ka dapit sa dakbayan gumikan sa kakusog sa hangin.

Si Jonathan Tumulak, hepe sa CTTODA sa siyudad nibutyag tungod sa mga natumbang kahoy nakabalda kini sa trapiko ug nabalik lang human nila nahipos.

Si Tumulak mipasidaan nga kinahanglang igmat ang motorista ilabi na sa panahon nga kusog ang hangin ilabi na sab kadtong moagi sa Cebu South Coastal Road nga nag-atubang sa dagat. (BANAT NEWS)