P16 milyong nga proyekto gibubo sa Danao
CEBU, Philippines — Moabot ngadto sa P16.8 milyones nga kantidad sa proyekto sa imprastraktura ang gibubo ni Kongresista Vincent Franco “Duke” Frasco sa syudad sa Danao.
Apil sa gitugyan ni Frasco ang P6.3 milyones nga financial assistance sa 420 ka beneficiaries nga tag P15,000 ang nadawat isip ayuda sa mga nawagtangan og panginabuhi tungod sa pandemya sa COVID-19.
P1.9 milyones usab nga kantidad sa water system ang gitugyan sa Barangay Balian. Laing P1.9 milyones nga water system sa Barangay Manlayag nga sa unang higayon nakaangkon na og direktang kuhaanan og tubig.
Sa press release nga gipagawas sa kampo sa kongresista apil sa iyang gibubo didto sa Danao ang P4.8 milyones nga kantidad sa covered court sa Barangay Sabang.
Sa Barangay Maslog gi-turn over usab ang P1.9 milyones nga water system nga gikalipay sa mga residente.
Ang syudad sa Danao, giila nga balwarte sa karibal sa politika ni Frasco. Kuyog usab sa kongresista sa pag bisita didto si bokal Red Duterte sa kinto distrito. —MEL (BANATNEWS)
- Latest
