65 ka establisamento sa Cebu City nakalapas sa protocols
CEBU, Philippines — Base sa datos sa Emergency Operations Center (EOC) Cebu City gikan sa Hulyo 2 hangtud 4, 2021 niabot na sa 975 ka establisamento sa Siyudad sa Sugbo ang ilang nabisita.
Nasayran nga niabot sa 65 ka establisamento ang nakitang adunay kalapasan ug siyam niini ang naisyuhan og Show Cause Order sa Business Permit and Licensing Office (BPLO).
Sa nilabay’ng semana ang BPLO ug Emergency Operations Center Cebu City adunay gibadlong nga hotels tungod kay nag-akumodar kini og bata nga nag-edad og 15-anyos paubos.
Si Atty. Jared Limquiaco, hepe sa BPLO nagkanayon nga base sa Executive Order ni Mayor Edgardo Labella ug sa Inter-Agency Task Force guidelines dili pa pwede ang mga menor de edad kini gawas lang kon “in house guest” ang menor apan kon walk-in ug nikaon lang sa restaurant o kaha adunay kalihokan dili pa kini pwede.
Nanghangyo ang EOC sa publiko nga kon adunay mabantayan nga establisamento nga wala motuman sa gipagawas nga guidelines isumbong kini sa Emergency Operations Center Task Force pinaagi sa pagtawag sa ilang numbero nga 0947 486 1655 ingon man sa landline number 411-0100 local 614, pwede usab mopadala og mensahe sa ilang Facebook page. BDB (BANATNEWS)
- Latest