Vaccination sites sa Cebu City sirado nasab
CEBU, Philippines — Sirado na sab karong adlawa ang tanang mga vaccination sites sa siyudad sa Sugbo tungod kay ang 14,920 doses sa Sinovac vaccines nga gihatag sa Department of Health Central Visayas sa Cebu City Government nahurot na.
Ang Cebu City dunay lima ka vaccination sites nga gilangkuban sa University of Cebu Senior Highschool building sa J. Alcantara Street, Barangay Sambag 1 ug Banilad Campus, SM Seaside City Cebu, Robinson’s Galleria ug NOAH Complex sa South Road Properties.
Gibutyag ni Cebu City Councilor Dave Tumulak, duha ra ka vaccination sites ang abli nga mao ang NOAH Complex ug SM Seaside kagahapong adlawa kay naa nalang sa 600 ka doses sa Sinovac ang ilang mahatag.
Ang 14,920 doses sa Sinovac vaccines nahurot lang sulod sa tulo ka adlaw ug tunga, paspas matod pa ang pagpamakuna.
Nabantayan nga daghan ang moadto sa mga vaccination sites nga mga walk-ins ug sigon ni Tumulak dili gyud ni kalikayan apan giawhag nila ang mga tawo nga magparehistro aron moadto sa mga vaccination centers kay nakadawat og text confirmation ilabi na karon nga gikontrolar nila ang mga tawo nga moadto sa vaccination site gumikan sa pagsaka sa kaso sa siyudad.
Sa laing bahin, ang kapulisan sa dakbayan gustong makisayod sa Emergency Operations Center kung unsa nga sector ang taas og kaso sa Covid-19 aron ilang matutokan sa pagbantay.
Si Police Lt. Col. Wilbert Parilla, deputy director for operations sa CCPO miingon nga ilang tutokan ang gigikanan sa taas nga kaso aron ipasunod ang minimum health standards.— IBM (BANATNEWS)
- Latest
