Kita sa CCSC gilaomang mosaka pa

CEBU, Philippines — Ang kita sa Cebu City Sports Center gilaomang mosaka kini tungod kay gitugot na nga ibalik ang zumba diha sa maong pasilidad matud sa manager sa CCSC Jundel Bontuyan.

Si Bontuyan nagkanayon nga karong Sabado nila giplanohan nga sugdan og balik ang zumba diin libre lang una kini apan sa adlaw’ng Lunes mobayad na ang mga moapil sa zumba.

Ang bayad sa moapil sa zumba giusbawan nila kini gikan sa P10 ngadto sa P20 tungod kay limitado man ang mga tawo nga pwedeng makaapil niini.

Matag adlaw ang schedule sa zumba gikan sa alas 5:00 sa hapon hangtud sa alas 6:00 sa gabieiug alas 6:00 sa buntag hangtud sa alas 7:00 sa gabii.

Samtang sa Sabado ug Domingo tag-usa ra ka session gikan sa alas 6:00 sa buntag hangtud sa alas 7:00 sa gabii.

Nasayran nga unang gibalik sa CCSC ang badminton nga gihulagway ni Bontuyan nga nakatabang sa pagsaka sa ilang kita diin moabot na kini sa P18,000 ngadto  sa P20,000 itandi sa unang buwan nga pag-abli nila nga naa lang sa P10,000 ngadto sa P15,000 ang kita.

Matud ni Bontuyan nga karon nga nisaka na og gamay ang kita sa CCSC nagsugod na usab sila sa pagpamalit og gamit alang sa rehabilitation sa pasilidad sama sa pintal, pag-ayo sa comfort rooms ug gibayaran na usab nila ang ilang mga utang kaniadto.

Ang CCSC aduna lang gihapon kini 25 ngadto sa 30 ka personnel.

Nasayran nga nagkadaghan na usab ang mga tawo nga moanha sa CCSC gikan sa 300 ngadto sa 400 karon anaa na sa 500 ngadto sa 600. BDB (BANATNEWS)