Pangabubho ang motibo pagpatay sa babaye
CEBU, Philippines — Selos ang gitan-aw nga motibo sa kapolisan sa hinungdan sa kamatayon sa 41-anyos nga babaye nga gidunggab-patay sa iyang kapuyo diha sa Semense B. Barangay Tipolo, Dakbayan sa Mandaue niadtong Sabado sa tungang gabii.
Nigawas sa imbestigasyon nga ang live-in partner sa biktima nga si Hazel Haynar,nag-duda nga duna kini kabit.
Matud pang Police Major Mercy Villaro, PIO sa Mandaue City Police Office, ang suspetsado nga si Jun Manata mitahan ngadto sa kapulisan ug miingon nga atol sa ilang panaglalis nalitok sa biktima ang mga pulong nga ‘Maypa si Insik.’
Tungod niini nasuko og maayo ang suspek ug gidunggab ang biktima makadaghang higayon hangtud nga kini namatay.
“Naa na silay awayan sad pod unya ang kato nga time, naabot siya’g kaadlawon, ilahang away kay katong selos unya na irita lang ang babae…ang nakapainit sa part sa suspect kay kato lang gyud niana ang babae nga maypa ang Insik,” sigun ni Villaro.
Ang biktima ug ang suspetsado upat ka tuig ng nag live-in. Naila sa mga silingan ang suspek nga seloso. Si Haynar aduna usab upat ka anak gikan sa una niyang partner.
Natanggong karon sa Mandaue City Police Station 2 ang suspetsado nga mag atubang sa kasong murder nga ipasaka karong adlawa (Monday). —IBM (BANATNEWS)
- Latest
