Produkto sa mga bag-ong negosyante gi-promote ni Gullas

CEBU, Philippines — Nagsunod-sunod nga nangabot sa buhatan ni Mayor Gerald Anthony “Samsam” Gullas Jr. sa Siyudad sa Talisay ang mga bag-ong negosyante.

Bitbit sa maong mga negosyante ang ilang nagkadaiyang produkto nga baligya ug nagpahulagway kauban sa mayor sa panghinaot nga kini maila sa kadaghanan aron mas modaghan usab ang ilang kita.

Si Norman Michael Bas, usa sa mga tag-iya sa “YoKakusa” nibutyag nga nakasugod sila sa ilang negosyo sa dihang gisugdan ang lockdown niadtong Marso 2020.

Matud ni Bas nga naputol ang iyang trabaho ug sa iyang mga barkada hinungdan nga nakahuna-huna sila sa pagpamaligya pinaagi sa online. Ang ilang produkto mao ang “Padthai” nga gikan sa Thailand nga street food, chicken wings nga naay nagkalain-laing sauce.

Pagkabuwan sa Septiyembre sa nilayang tuig nakaabli sila sa ilang tindahan diha sa Barangay Poblacion hangtud karon.

Nahimong kustomer nila si Gullas ingon man ilaha usab kining gihatagan og produkto aron ang ilang tindahan ma-promote.

Usa lang ang YoKakusa nga nanghinaot nga sa ilang ginagmay nga negosyo molambo taliwa sa pandemiya nga nasinati.

Sayo pa, si Gullas ug ang iyang asawa nagkasabot nga motabang sa mga bag-ong magpapatigayon tungod sa sitwasyon nga naglisod ang tanan gumikan sa COVID-19.

Si Gullas ni-promote sa mga baligya dili lang mga pagkaon lakip na sa mga sinina ug mga tanom nga maabot sa ilang buhatan.

Ang mayor nihimo sa pag-promote pinaagi sa iyang face book page nga adunay liboan ka followers dili lang sa Talisaynon lakip na ang uban nga nagpuyo sa nagkalain-laing dapit. —BDB (BANATNEWS)