Duterte Pa rin Movement sa kabisay-an gilusad

CEBU, Philippines — Pormal nga gilusad kagahapon ang Duterte Parin Movement alang sa Kabisay-an nga gipahigayon sa Radisson Blu, Dakbayan sa Sugbo.

Tumong niini ang pag-awhag kang Davao City Mayor Sara Duterte nga modagan pagka-presidente sa sunod tuig nga eleksyon.

Ang Sugbuanong negosyante nga si Dr. Winley Dela Fuente ang natudlo nga deputy secretary for Visayas kinsa dungan nga nanumpa sa uban pang mga opisyal atubangan ni Juniño Padilla, ang national secretary-general sa grupo.

Si Dela Fuente dunay grupo nga gitawag og Ordinaryong Lungsuranon nga una na nga nilusad sa Run Sara Run ug dunay sinemanang pagpanghatag og bugas ug ubang kalihukan sama sa pagpanglimpyo sa baybayon ug pagpananum og kahoy.

Gipasabot ni Dela Fuente nga ang Duterte Parin Movement maoy magsilbing payong sa lain-lain grupo nga mangampanya alang kang Duterte lukop nasud.

“Nakita namo sa mga gestures and everything the way siya moestorya murag naa nay paglaum mi nga nag-awhag kaniya nga modagan siya,” matud ni Dela Fuente.

Kapin sa 300 ka mga negosyante ug mga opisyal sa gobyerno ang nanambong sa kalihukan sanglit limitado lang ang makasulod sa lugar subay sa lagda sa Inter-Agency Task Force. Matud ni Dela Fuente nga human sa Visayas-wide nga paglusad, ila himoon ang kalihukan sa regional level aron pagpasabot sa ilang adbokasiya.

Sumala pa niya nga dili sila mangimbitar og mga personalidad apan andam sila modawat sa gustong moipon ug motuo sa ilang adbokasiya.

Gipasabot ni Dela Fuente nga si Sara lang ang makapadayon sa nindot nga nahimo ni Presidente Rodrigo Duterte ug maoy moputol sa mga bati nga gipanghimo sa mga sakop sa iyang amahan.

“Inday Sara is a better Duterte, di ma-compromise which is maoy sipyat ni Digong nga daghan compromise sa iya leadership,” dugang ni Dela Fuente. MEL (BANATNEWS)