Pagpanawat og application sa traditional jeepneys gisugdan na

CEBU, Philippines — Gisugdan na niadtong Hunyo 5, 2021 ang pagpanawat sa application for acceptance aron makabiyahe ang dugang traditional jeepneys sa Cebu City diin hangtud kini sa Hunyo 11, 2021.

Kini human gibuksan na sa Cebu City ang tanang 37 ka rota.

Matud sa regional director sa Land Transportation Franchising and Regulatory Board-7 Eduardo Montealto Jr. nga adunay gibutang nga one-stop-shop ang local government unit sa Cebu City aron adto i-submit sa operator ang dokumento.

Giklaro ni Montealto nga tugotan lang mobiyahe ang traditional  jeepneys kong makapasar kini sa road worthiness, adunay bay plastic barriers ang sulod sa sakyanan ug  mopasar kini sa motor vehicle inspection nga ipahigayon sa Land Transportation Office.

Ug ugaling dili makapasar ang traditional jeepney sa mga rekisitos, dili usab kini mahatagan sa LTFRB-7 og special permit to operate.

Matud ni Montealto nga adunay 468 ka traditional jeepneys ang nagdagan karon sa Cebu City.

Nagkanayon si Montealto nga 1,200 ka traditional jeepneys ang gitugotan nga modagan sa siyudad.

Nasayran nga diyotay lang ang traditional jeepney operators nga ni-apply alang sa application for acceptance.

“Ang medyo dako na og gasto sa pagpakondisyon sa ilang units, decided not to rehabilitate their units anymore but to wait for their MPUJ as members of Cooperative or Corporation”, matud ni Montealto.

Gibutyag ni Montealto nga kasagaran sa mga traditional jeepney operators nag-operate na karon og modernize jeepneys.

Sa pagkakaron aduna nay 646 modernized jeepneys ang Sugbo ug adunay bag-ong 10 ka units nga hatagan og provisional authority to operate sa LTFRB-7 karong Hunyo 19, 2021. BDB (BANATNEWS)