Mega-vaccination center sa Cebu City giandam na

CEBU, Philippines — Gipaabot nga karong Hunyo 12 buksan ang Noah Mega Vaccination Center sa siyudad sa Sugbo. Ang pasilidad naa ra mahimutang duol sa building nga gihimong isolation facility sa siyudad diha sa South Road Properties.

Ang Bigfoot Studios nag-abang og luna diha sa South Road Properties(SRP) diin gitukod ang ilang studio apan tungod sa pandemiya gipagamit nila kini sa siyudad ug gihimong New Oasis for Adaptation and a Home(NOAH) Complex diin gibutang ang mga COVID-19 positive patients.

Apan niadtong Mayo 15 napupos na ang Memorandum of Agreement sa siyudad ug sa Bigfoot Studios.

Tungod sa umaabot nga lapad nga pagpamakuna batok Covid-19 sugod karong buwana nagkinahanglan ang dakbayan og mas lapad ug haom nga pasilidad ug napili nila ang nahisgutang luna.

Si Dr. Daisy Villa, usa sa mga sinaligan sa operasyon sa NOAH Mega Vaccination Center miingon nga magpaabot nalang sila kun dunay bakuna nga mangabot.

Dunay giandam nga upat ka bus ang siyudad aron maoy mokuha ug mohatod sa mga magpabakuna sa maong pasilidad sa SRP.

Ang Cebu City aduna karoy kinatibuk-ang 24,432 ka mga kaso sa COVID-19 sukad miigo ang pandemiya sa miaging tuig human  44 ka bag-ong kaso ang nadugang apan 532 lang ang aktibong kaso base sa datos sa Department of Health Central Visayas.

Ang kadagkoan sa Cebu City Medical Center (CCMC)  mitabang na sab sa COVID-19 Vaccination Massive Information Drive pinaagi sa pagbisita sa mga barangay  aron ipahibalo sa katawhan nga kinahanglang magpabakuna batok sa maong sakit.

Ang grupo gipangulohan mismo ni CCMC Hospital Administrator Ma. Yvonne Cania kauban silang Medical Director Dr. Anton Oliver A. Reposar II ug Assistant Medical Director Dr. Eduardo A. Camalongay.

Una nilang gibisita ang barangay Kalunasan, Guadalupe, Sapangdaku, Pamutan, Toong, Buhisan, Labangon, Calamba, Sawang Calero, Pasil,  Sto. Niño ug Suba.

Sa pikas bahin, 13 mil ka Talisaynon ang nagpaabot nga mabakunahan batok corona virus disease apan nadelatar tungod kay nahutdan na og bakuna ang Dakbayan sa Talisay. Si Dr. Rey Cesar Bautista sa City Health Office nga kining 13 mil gusto gyud magpabakuna. Naa na sa kapin singko mil tawo ang nabakunahan nga kasagaran mga senior citizen.

Naa nalang sab sa 27 ang aktibong kaso sa siyudad karon. (BANATNEWS)  —Sanden J. Anadia , Gabriel Bonjoc/IBM (BANATNEWS)