50 ka indibidwal gipabakwit; Babaye nilayat sa motor pagdahili sa yuta

CEBU, Philippines — Niabot sa 50 ka indibidwal sa Barangay Lawaan 2, Dakbayan sa Talisay ang gipabakwit tungod kay nameligro nga matumpag ang nahimutangan sa ilang mga balay gumikan sa pagsaka sa tubig sa sapa tungod sa walay hunong nga uwan dala sa bagyong Dante  kagahapon.

Si Alvin Santillana, pangulo sa City Disaster Risk Reduction and Management Office nagkanayon nga wala ra hinuon niabot sa kritikal nga estado ang pagsaka sa tubig sa sapa.

Si Kapitan Edwin Etcobanez sa Barangay Lawaan 2 nagkanayon nga ilang gipahiluna sa luwas nga lugar ang mga pamilya ug gisuportahan nila kini og pagpakaon. Samtang sa Campo 6, Barangay Manipis usa ka babaye nga nagmaneho og motorsiklo ang naatlan sa pagdahili sa yuta maayo gani nga dali kining nakalayat gikan sa motorsiklo nga iyang gisakyanan ug wala maigo sa mga bato ug yuta nga nidahili paingon sa iyang nahimutangan.

Si kapitan Joselito Laurente sa Manipis nibutyag nga gikan sa Dakbayan sa Toledo ang maong babaye diin niadtong higayona padulong na unta kining mopauli sa ilaha sa Barangay Lagtang dihang kalit lang nga nidahili ang yuta diha sa lugar.

Ang maong babaye diha gipakatulog sa opisyal sa ilang barangay hall sa Manipis ug pagkabuntag sa sunod adlaw nipauli na kini sa ilaha. —BDB (BANATNEWS)