Lalaki grabeng nasamdan human dunggaba sa iyang kainom

CEBU, Philippines — Grabeng nasamdan ang usa ka tawo nga biktima sa pagpanunggab sa iyang gikainom nga silingan sa Zone Talong, Barangay Paknaan sa Dakbayan sa Mandaue, Lunes sa kaadlawon.                        

Si Police Staff Master Sergeant Lemar Pontillas sa kapolisan sa Presinto 3 sa Mandaue City Police Office (MCPO) miila sa biktima nga si Richard Aberlla, 27 anyos ug ang suspetsado nga nagdunggab mao si Jovanie Damole Caballes, 41 anyos nga pulos nagpuyo sa maong dapit.                         

Matud pa ni Pontillas nga nag-inom ang biktima ug suspetsado kauban sa pipila nila ka mga higala dihang kalit lang mitumaw ang panaglalis human nahisgotan ang karaan nilang panagbangi.                                      

Dugang pa ni Pontillas nga taliwala sa mao nilang panaglalis ang suspetsado nakahigayon sa pagkuha og kutsilyo dayong dunggab ngadto sa tiyan sa biktima.                                     

Dali nga gihatod sa iyang sakop sa pamilya ang biktima ngadto sa Mandaue City Hospital apan gibalhin kini ngadto sa Vicente Sotto Memorial Medical Center (VSMMC) sa Dakbayan sa Sugbo ug kasamtangan nga giatiman sa mga doctor.                                     

Samtang ang suspetsado nga mipauli sa ilang panimalay human sa maong hitabo ang gidakop sa mga sakop sa kapolisan sa Presinto 3 ug gibalhog na sa bilangguan. —MEL (BANATNEWS)