NOAH kutob nalang karong Mayo 30
CEBU, Philippines — Karon nalang kutob sa Mayo 30, 2021 ang operasyon sa New Normal Oasis for Adaptation and a Home (NOAH) Complex diin butangan sa mga napositibo sa Covid-19. Apan nagtinguha ang Siyudad sa Sugbo nga hangyuon ang kadagkoan sa BigFoot Studios nga gamiton kining vaccination site.
Sigon pang Cebu City Vice Mayor Michael Rama ang Bigfoot Studios nag-abang og luna sa South Road Properties (SRP) nga gitukoran nila og building.
Ang maong building libre nga gipagamit sa maong kompanya para sa siyudad sa dihang nibuto ang pandemiya ug kini mao karon ang gitawag og NOAH Complex, nga gigamit isip isolation facility para sa mga napositibo sa Covid-19.
Apan niadtong Mayo 15 ang Memorandum of Agreement sa Cebu City Government ug Bigfoot Studios natapos na ug sugod niadtong Mayo 5 wala na sila manawat pa og pasyente.
Matud ni Rama haom nga himuong vaccination site ang NOAH complex gumikan sa kadako sa lugar niini ug dili sab magproblema alang sa parking.
“Actually convertible gyud ni siya kung mosugot ang management under ni Michael Gleissner,” sigon ni Rama.
Gani si Atty. Jocelyn Pesquera miingon kun mosugot ang management sa Bigfoot Studios sa hangyo sa siyudad dili magproblema ang mga tawo sa tranportasyon kay dunay bus nga giandam aron masakyan sa mga bakunahan. Nakahinabi na ni Rama ang representante sa Bigfoot Studios nga si Joe Mercado apan wala pay desisyon.
Dako ang natabang sa NOAH Complex sa dihang misaka ang kaso sa COVID-19 sa siyudad.
Kun masirado na ang NOAH unya kalit mosaka ang mga kaso sa Covid-19, si Pesquera miingon nga dunay dakong hawan sa likod nga bahin sa maong complex nga pwedeng butangan og tents aron himuong isolation facility.
Sa laing bahin, dili pa interesado si Mayor Jonas Cortes sa Mandaue City magbaton og Mobile Vaccination Clinic kondili palapdan ang operasyon sa mga
vaccination centers ini og magsugod na ang mass vaccination.
Ang dakbayan dunay tulo ka mga vaccination centers nga naglakip sa Mandaue City Cultural and Sports Complex, University of Cebu Lapu-Lapu - Mandaue (UCLM) campus new building ug ingon man ang Vicente Gullas Medical Hospital.
“Ang mobile man gud we have to consider the handling of vaccines, importante kaayo ang storage. Dili ni tiaw ang kantidad if we talk about vaccines we cannot afford nga ato lang ning usikan," pagklaro pa ni Cortes. —Romeo T. Limpangog/IBM (BANATNEWS)
- Latest
