Mga residente sa tulo ka barangay sa siyudad prayoridad sa trabaho
CEBU, Philippines — Mga residente sa tulo ka barangay sa Siyudad sa Sugbo ang hatagan og prayoridad nga makatrabaho sa pagsugod unya sa construction sa phase 1 sa Carbon Modernization Project nga gikatakdang ipahigayon sa sunod buwan.
Gipaniguro sa Cebu2World Development, Inc. (C2W) nga kauban sa Megawide Construction Corporation nga magkuha sila og mga trabahante sa construction nga taga Barangay Ernita , Señor Sto. Niño ug San Roque.
Matud sa Megawide nga ang maong proyekto makahatag og 2,000 ka direct ug indirect employment opportunities.
Nasayran nga sugdan karong buwana ang mga inisyal nga posisyon nga gikinahanglan sa construction.
Mag-hire sila og office-based personnel sama sa engineers ug quality assurance officers.
Nangita usab sila og skilled workers sama sa steel men, panday, masons ug helpers.
Ang mga aplikante ipaubos kini sa screening nga mohaom sa minimum standards nga gikinahanglan sa partikular nga posisyon.
Gawas sa mga oportunidad sa panarbaho adunay gihimo nga mga konsultasyon sa mga barangay aron masuta ang mga prayoridad alang sa dugang unod sa ilang corporate social responsibility programs (CSR) sama sa livelihood trainings.
Usa sa ilang plano mao ang pag-imbetar sa mga operator og karenderiya sa Carbon Public Market ug umolon ang barangay groups aron mosalmot sa supplier selection process alang sa gustong mamaligya og pagkaon sa construction site. BDB (BANATNEWS)
- Latest