Habal-habal driver patay human napusilan sa Mandaue

CEBU, Philippines — Patay ang usa ka 39 anyos nga habal-habal drayber pipila ka oras human sa iyang pagsaulog sa adlaw nga natawhan diha sa Sitio Lalin, Barangay Jagobiao sa Dakbayan sa Mandaue.

Ang biktima nga si Fernando Darain Berdesada giingong nadiskubrihan sa iyang kapuyo nga nakabaton og samad pinusilan sa tuong bahin sa iyang agtang ug tuong bahin sa iyang dughan.

Suma pa ni Police Major  Marvin Figarido, hepe sa kapolisan sa Presinto 3  sa Mandaue City Police Office (MCPO) nga segun sa asoy sa kapuyo sa biktima nga si Maricel Estremos nga paingon na sila nga mangatulog pasado alas 2 sa kadlawon dihang nakadungog sila og boto sa armas. 

Nakadungog usab og andar sa motor palayo sa ilang lugar ang kapuyo niini ug mao na lay iyang nadunggan ang biktima nga misyagit nga naigo siya.                               

Dali untang gidala ang biktima sa Eversely Child Sanitarium and General Hospital apan gideklarar kini nga dead on arrival sa doctor nga nag-atiman niini.                                              

Samtang ang igsoon sa biktima nga si Rey Berdesada mitug-an sa mga imbestigador nga nagsaulog sila sa adlaw nga natawhan sa iyang igsoon ug dihang paingon na sila nga mamahuway nakadungog sila og boto sa armas. 

Wala makamatikod ang kabanay sa biktima nga aduna kini gika-away. Apan dili usab sila makapaniguro kun gituyo ba kini sa pagpusil o naigo lang kini sa saag nga bala.

Sa laing balita, usa ka lalaki ang nakalas human gidunggab sa ilang silingan sa Barangay Caduawan, Lungsod sa Tabogon, niadtong Miyerkules.

Ang nakalas naila nga si Ednie Ornopia, 42anyos ug molupyo sa Purok Nangka.

Samtang ang suspetsado naila nga si Vincent Pabiran, kinsa dali ra usab nitahan sa iyang kaugalingon human sa maong insidente. Sa initial nga imbestigasyon sa kapulisan sa Tabogon, giingong nakainom ang biktima sa dihang nakalalis ang suspetsado ug namunal kini og botelya hinungdan nga gidunggab kini sa makadaghan nga higayon. — Rowena D. Capistrano ( BANAT NEWS)