P60 milyones shabu na ang nasakmit sa Talisay City
CEBU, Philippines — Miabot na og P60 milyones nga kantidad sa shabu ang kinatibuk-ang nasakmit sa kapulisan sa Dakbayan sa Talisay sukad nga milingkod nga hepe sa kapolisan sa siyudad si Police Lt. Col. Gerard Ace Pelare. Si Pelare milingkod sa Talisay City Police Station niadtong hinapos nga buwan sa tuig 2019. Ang maong mga shabu nasakmit gikan sa 1,200 ka mga drug personalities gikan sa nagkalain-laing barangay sa Talisay.
Si Pelare nipaila sa iyang liderato sa pagpuhag sa mga tawo nga nalambigit sa ginadiling drugas dili lang sa pagdakop kundi lakip na dinhi ang pagtabang sa mga tawo nga gusto nang mobiya sa bisyo.
Ubos sa iyang pamunoan, 700 ka mga kaniadto drug addicts ang nitahan ug ilang napaubos sa After Care Program sa dakbayan alang sa rehabilitasyon. Ubos sab sa iyang liderato na nadeklarar ang Barangay Tapul nga drug-free barangay si Mayor Gerald Anthony “Samsam” Gullas Jr. nalipay sa mga nahimo sa kapulisan hinungdan sa iyang suporta kanila.
Ang Brgy. Tanke nga usa sa barangay sa Talisay nga grabeng gihugopan sa problema sa ilegal nga drugas ug maoy hinungdan sa mga krimen karon nakatagamtam na og kalinaw ug mikooperar ang mga residente sa programa ug kampanya sa kapolisan.— IBM (BANATNEWS)
- Latest
