PDAO i-establisar sa Cebu City pagpalambo sa programa sa PWD

CEBU, Philippines — Nipasar og ordinansa ang konseho sa Siyudad sa Sugbo sa pag-establisar og Persons With Disability Affairs Office (PDAO).

Tumong niini nga mapalapdan pa ang mga programa sa PWDs sa siyudad.

Si Konsehal Lea Japson maoy nigama sa ordinansa alang sa PWDs nga mga residente sa Siyudad sa Sugbo.

Ang responsibilidad sa PDAO mao ang paggama og mga plano ug pag-implementar sa mga polisiya ug programa alang sa kaayohan sa PWDs.

Magsilbi usab kini nga general information ug liaison center sa PWDs ug mag-monitor usab sa data niini sa siyudad ug motabang sa pag-monitor sa fundraising activities sa PWDs, ug uban pa.

Ang mangulo sa PDAO mao ang Disability Affairs Officer II nga tinudlo sa mayor pinasubay sa  rekomendasyon sa City Personnel Selection Board  ug tulo ka tuig ang termino niini.

Motabang usab sa mga programa sa PDAO ang Department of Social Welfare Services (DSWS).

Makauban sa head sa PDAO ang lima ka office  personnel nga  adunay kwalipikasyon nga Social Welfare Assistant, Administrative Assistant I (Secretary I), Administrative Aide IV (Clerk II), Administrative Aide III (Utility Worker II) ug Administrative Aide III (Driver I).

Sa higayon nga mahan-ay na ang tanan ipahigayon dayon ang general assembly sa PWD’s.

Ang PWD’s sa Dakbayan sa Sugbo aduna kini P1,000 matag buwan nga financial assistance  gikan sa kagamhanan sa siyudad .

Base sa talaan sa DSWS ang siyudad adunay dul-an sa 12,000 ka rehistradong   PWDs nga beneficiaries sa financial assistance. —BDB (BANATNEWS)