2 nasikop sa managlahing buy-bust operation
CEBU, Philippines — Usa ka 27anyos nga lalaki ang nasikop atol sa buy bust operation sa mga tinugyanan sa Labangon Police Station sa may Barangay Buhisan ning Dakbayan sa Sugbo.
Ang nasikop naila nga si Jobert Blanca, 27anyos, dunay kapuyo, walay trabaho ug residente sa maong lugar.
Nangulo sa maong operation mao si Police Lt. Joel Dela Cerna ug mga kaubanan niini.
Nasakmit gikan kang Blanca ang pipila ka putos sa ginadili nga drugas.
Matud pa ni Dela Cerna, nga si Blanca, makonsiderar nga usa ka street level drug pusher, ug bag-o pa kini nilang naila nga nalambigit sa illegal nga drugas ug unang higayon pa kini nga nasikop.
Samtang sikop usab ang usa ka habal-habal driver nga senior citizen nga nag-sideline sa pagpamaligya og shabu atol sa buy bust operation sa kapolisan sa Barangay Cansaga sa Lungsod sa Consolacion niadtong Miyekoles sa gabii.
Si Police Major Verniño Noserale, hepe sa Consolacion Police Station miila sa ilang nadakpan nga si Andriano Pilapil Tagalog, 62 anyos nga nagpuyo sa Sitio Compang, Barangay Tayud, Lungsod sa Liloan.
Matud pa ni Noserale nga ilang nasayran nga naghimo sa ilegal nga kalihokan ang suspek hinungdan nga naaghat sila sa pagpasiugda og buy bust operation.
Nakuha gikan sa iyang posisyon ang buy bust money ug ingon man ang tulo ka paketeng shabu nga nagkantidad og P816, 000. —Romeo T. Limpangog/MEL (BANATNEWS)
- Latest