Traffic violators kapin sa 20 mil

CEBU, Philippines — Miabot ngadto sa 21,340 ka citation tickets ang naisyu sa Cebu City Transportation Office (CCTO) ngadto sa traffic violators sa buwan lang sa Marso.

Mas daghan kini itandi sa 11,264 citation tickets nga na-isyu sa buwan sa Pebrero.

Nalakip na niini ang 840 ka mga tag-iya og sakyanan nga na-clamp. Suma pa ni CCTO Deputy Chief of Operations ug information officer Paul Gotiong nga nisaka kini gumikan sa lapad nila nga pag-roving sa kadalanan ingon man ang gipatuman nga road clearing.

Giawhag ni Gotiong ang naisyohan og citation ticket nga i-settle dayon kini diha sa ilang buhatan nga nahimutang sa ikaduhang andana sa Ramos Public Market gikan sa Lunes hangtud Biyernes, 8am-5pm.

“Kun balewaon nila ang citation tickets, posibleng pasakahan gyud nato sila og kaso,” suma pa ni Gotiong sa pakighinabi niini sa Banat News kagahapon.

Kasagaran sa ilang nadakpan walay lisensya, wala mosunod sa traffic signs, gubaon ang headlights ug signal lights, ingon man illegal parking.

Samtang sa laing bahin gidakop ang usa ka motorista nga nag gara-gara sa pagmaneho sa iyang motorsiklo diha sa Gullas Heights sa lungsod sa Minglanilla niadtong miaging semana.

Gisikop sa mga sakop sa Minglanilla Traffic Commission (MITCOM) si Carlito Briones, taga Pardo, Siyudad sa Sugbo.

Si Francis Sanguenza, pangu sa MITCOM miingon nga gisita nila si Briones tungod kay nag-gara gara kini sa pagmaneho og ilang nahibaw-an nga way dokumento ang iyang motorsiklo.

Nakamugna usab og peligro sa iyang kaugalingon si Briones ingon man sa ubang motorista tungod kay nag-exhibition kini samtang nag-drive sa iyang motor nga gikuhaan ug hulagway sa ubang mga riders. Gabriel Bonjoc/MEL (BANATNEWS)