Manag-agaw nangalumos human og luwas sa duha ka menor

CEBU, Philippines — Duha ka manag-agaw ang nalumos samtang nangaligo niadtong Martes sa hapon diha sa kadagatan sa Barangay Tajao, Lungsod sa Pinamungahan.

Ang nangalumos mao sila si Jimuel Nillama, 18-anyos, taga Mojon, Amihaw, Dakbayan sa Toledo ug Fid Carlos Genon, 22.

Matud ni Police Corporal Ryan Manguilimotan, desk officer sa Toledo City Police Station nga giingong nangaligo sa dagat si Nillama ug Genon diin uban nila ang duha ka menor de edad nga manghud ni Nillama.

Giingong alas 4:00 sa hapon nahitabo ang insidente ug nataho kini ngadto sa kapolisan pasado alas 5:00 na sa hapon. Base sa imbestigasyon sa kapolisan giingong diha ra sa mabawo nga bahin sa dagat nangaligo ang mga manag-agaw apan kalit lang nilawom ang tubig sa ilang nahimutangan.

Ang duha ka manghud ni Nillama deriyot nangalumos ug dali niya kining giluwas ug nitabang usab si Genon sa pagluwas.

Ang duha ka menor nangaluwas kini ug niadtong higayona si Nillam naglisod sa paglangoy ug gisuwayan usab kini pagluwas ni Genon apan silang duha ang nangalumos diin gituohan nga gipangbikogan kini.

Ang lawas ni Nillama maoy unang na-rekover tungod kay nilutaw dayon kini samtang kang Genon nilanat pa og pipila ka minuto.

Nasayran nga ang mga nangalumos nananghid sa ilang pamilya nga mangaligo sa dagat ug gipahimangnoan kini nga dili magpalawom. —BDB (BANATNEWS)