Mga nabuhat ni “Dodong” Gullas giila sa Senado

CEBU, Philippines — Usa ka resolusyon ang gipasar sa Senado nga nagpasidungog kang anhing The Freeman/ Banat News Chairman Dr. Jose “Dodong” Gullas ug nagpaabot sa ilang pahasubo ngadto sa mga nailo nga pamilya niini.

Ang Senate Resolution No. 90 nga giduso ni Senador Richard J. Gordon gi-adopt sa Senado niadtong Marso 1, 2021 ug gipirmahan nilang Senate President Vicente Sotto III ug ni Secretary of the Senate Myra Marie Villarica nagpadayag sa ilang dakong pagdayeg sa mga nahimo ni Gullas sa Sugbo ug sa nasud sa buhi pa kini.

“Resolution honoring the life dedicated to public service of former Representative Dr. Jose “Dodong” R. Gullas and expressing the profound sympathy and sincere condolences of the Senate of the Philippines on his death February 25, 2021,” pagbasa pa sa resolusyong gipadala ngadto sa iyang anak nga si The Freeman/ Banat News Vice Chairman John Vicente Gullas.

Si Gullas mao ang chairman sa The Freeman ang kinaunahang pamantalaan sa Visayas nga gitukod sa uyoan niini niadtong 1919 nga iyahang gibuhi pagbalik niadtong 1965.

Gikan niadto hangtud sa iyang kamatayon niadtong Pebrero 25, 2021 siya maoy chairman sa maong pamantalaan ug sa igsuon niining tabloid nga mao ang Banat News.

Ubos sa iyang pagdala , nakadawat og daghang mga pasidungog ug pag-ila ang The Freeman ug Banat News.

Lakip sa giila sa Senado nga mga nahimo ni Gullas mao ang pagdala niini sa University of the Visayas, ang kinaunahan nga unibersidad sa Kabisay-an nga diin daghan ang  mga nagmalampuson sa kinabuhi pinaagi sa “study now, pay later plan” nga gitanyag sa unibersidad.

Ang pagkahimong representante sa Kongreso ni Gullas sa Unang Distrito sa Sugbo atol sa 12th Congress niadtong  tuig 2001 hangtud 2004, nga bisan usa lang ka termino siyang milingkod dako siya og nahimo sa distrito ug labaw sa tanan ngadto sa mga pampublikong magtutudlo ug non-teaching staff sa Department of Education.

Si Gullas maoy hinungdan ug instrumento kun nganong ang tanang suholan sa mga sakop sa DepEd na decentralized.

Kaniadto, ang suholan sa mga kawani s adto sa Manila iproseso hinungdan nga nagsige og ka delatar ang mga tseke, hasol kaayo kung dunay mga sayop o adjustments tungod kay adto pa sa Manila lihukon.

Apan tungod sa pagpangusog ni Gullas, diha na sa mga rehiyonal nga buhatan sa DepEd gihikay ang ilang suholan.

Giila sab sa Senado ang pagkahimong kampeyon ni Gullas sa pagpreserbar sa kinaiyang Sugboanon, kultura, arte ug musika, pagkahimo niyang “educator,” pagkatigbalita ug ingon man ang iyang debosyon ngadto sa Simbahan. (BANATNEWS)