Kalihokan sa Semana Santa tukion EOC, CCPO ug Simbahan

CEBU, Philippines — Ang Emergency Operations Center makigtagbo sa mga kadagkuan sa Archdiocese of Cebu, kapolisan ug kang Konsehal Philip Zafra alang sa ipahigayon nga coordination meeting para sa umaabot nga kalihukan sa Semana Santa. Si Konsehal Joel Garganera, Deputy Chief Implementer sa EOC nga gikahinabi sa mga tigbalita miingon nga  ang tigum nila anha ipahigayon sa Basilica Conference Room karon adlaw nga Lunes.

Dugang pa ni Garganera, karon Martes makigtigum usab sila sa City Market Administrator aron malikayan usab ang nahitabo nga pagdasok sa Carbon Public Market sa nilabay nga tuig tungod sa “binignit” nga diin nagdasok ang mga tawong namalit og sagol para sa binignit alang sa umaabot nga Semana Santa.

Sumala pa ni Garganera, ilang tigumon tanan apil ang CSET, CCTO ug PROBE aron sa pagsigurong higpit tumanon sa tanan ang health protocols ug pagkanselar sa mga tradisyonal nga kalihokan  sa Semana Santa.— IBM (BANATNEWS)