60 ka violators nasikop sa ‘Oplan Bulabog’

CEBU, Philippines — Moabot sa 60 ka mga malapason sa quarantine protocols ang nasikop atol sa pagbalik sa operasyon sa ‘Oplan Bulabog’ Lunes sa gabii. Suma ni Police Lt. Col. Wilbert Parilla, Deputy City Director for Operations sa Cebu City Police Office nga sa maong mga dinakpan, 11 niini mga menor de edad ug 49 ang mga hamtong.

42 nila nakalapas sa curfew ordinance, 15 ang wala magsul-ob og face mask, 1 ang wala’y quarantine pass ug 2 nakalapas sa liquor ban.

Ang mga nasikop gi-turnover sa Barangay Tejero isip temporary holding area sa tanang quarantine violators.

Gipasabot ni Parilla nga minus na lang ang ilang nasikop nga mga violators dili sama kaniadto nga moabot og 200 ka tawo matag adlaw ang ilang madakpan.

Lakip sa rason sa pagkunhod sa mga nadakpan mao nga nasayod na ang katawhan sa ilang higpit nga pagpatuman sa health protocols ingon man daku usab og tabang ang dugang pwersa sa kapolisan.

“Especially naa na sad tay mga Task Force K.A.S.A.L.I.G.A.N nga mibalik og detail na sa atoa so dako kaayo og tabang together with sa mga job order employees sa City Hall, CESET ug ang PROBE nga mao say dako og tabang”, asoy ni Lt. Col. Parilla.

Gitug-an usab sa opisyal nga nituman na ang mga establisamento sa executive order ni Mayor Labella nga nagdili sa ilimnong makahubog. Rowena D. Capistrano/MEL (BANATNEWS)