Cortes subling nimando sa total liquor ban sa Mandaue
CEBU, Philippines — Subli nga gimando ni Mayor Jonas Cortes sa Dakbayan sa Mandaue ang total liquor ban sugod niadtong nilabay nga Sabado.
Si Cortes niluwat kini sa Executive Order No. 9 nga nagdili sa mga tawo, restaurant, hotels, resorts, convenience stores, sari-sari stores ug uban pang establisamento sa pagbaligya og ilimnong makahubog diha sa siyudad.
Subay niini, ang mga nagpanuigon og 15 hangtud sa 65-anyos pataas lakip sa mga mabdos ang gidid-an usab sa paggawas sa ilang panimalay gawas lang sa mahinungdanon nga katuyoan sama sa pagpa-checkup sa ilang panglawas.
Gimando usab sa maong EO nga ang tanang food establishment 50 porsyento lang sa ilang kapasidad sa customer ang pwedeng makasulod.
Samtang ang mga establisameto nga gitugotan usab sa pag-operate sulod sa 24 oras ang motanyag og “take out service” hangtud lang sa alas 10:00 sa gabii.
Higpit usab nga gidili ang tapok-tapok sama sa pagpahigayon og birthday party, pista ug uban pa.
Nunot niini, ang health protocols nga naglakip sa pagsul-ob og face mask ug ang curfew sa alas 11:00 sa gabii hangtud sa alas 4:00 sa kaadlawon ang higpit usab nga gipatuman sa kagamhanan sa siyudad.
Ang kapolisan sa Mandaue City Police Office (MCPO), Legal Enforcement Unit, City Treasurer Office (CTO), Business Permit Licensing Office (BPLO) ug uban pa nga mga regulatory nga buhatan sa siyudad ang gimandoan sa pagsusi sa mga balay patigayon kalabot sa pagpatuman sa minimum health standards. BDB (BANATNEWS)
- Latest