Oponganon dasigon sa pagpabakuna batok sa COVID-19

CEBU, Philippines — Gitinguha ni Mayor Junard Ahong Chan sa Dakbayan sa Lapu-Lapu ang pag-hire sa mga tricycle driver alang sa pagpahigayon og rekorida diha sa tibuok kabarangayan  sa siyudad.

Kini aron sa pagsabwag og mga kasayoran kalabot sa kaayohan nga makuha alang niadtong magpaubos sa bakuna batok sa COVID-19.

Matud ni Chan nga molanat hangtud sa napulo ka adlaw ang pagpahigayon og rekorida ug matag usa sa mga tricycle driver makadawat kini og P500 matag adlaw. Nasayran nga si Chan ang nakapahigayon na  sa pagpang-apod-apod og 100,000  ka leaflets nga nagdala  sa ulohan nga “Mga  Kasagarang Pangutana Kabahin sa Bakuna”.                          

Ang matag pangutana nga gibutang sa maong leaflets aduna usab kini tubag nga nagpasabot kalabot sa kamahinungdanon sa pagpabakuna batok sa COVID-19.

Nunot niini, gipadayag ni Chan nga aron sa pagpakita nga luwas ang bakuna tinguha niya nga mag-una siya sa pagpabakuna. — BDB (BANATNEWS)