Mga biyahe sa barko kanselado tungod ni Auring
CEBU, Philippines — Tungod sa dagkong bawod ug kusog nga hangin pipila ka mga biyahe sa Central Visayas ang wala itugot sa Coast Guard Station Central Cebu tungod sa bagyong Auring.
Wala palargaha ang mga sakyanang motabok sa dagat padung sa Northern Samar, Eastern Samar, Samar, Biliran, Leyte, Southern Leyte, Cebu, Negros Oriental Bohol, Siquijor, Camiguin, Surigao ug uban pa.
Si Philippine Coast Guard-Central Visayas spokesperson Commander Alvin Dagalea miingon nga 742 ka pasahero karon ang na- stranded, 170 rolling cargoes, 64 vessels and 32 motor banca ang wala palargaha.
Samtang ang nagpasilong adunay 13 ka vessels ug 15 ka motorbanca. Ang coastguard padayon niawhag sa mga mananagat nga dili mokompiyansa ug dili managat tungod sa kadagko sa balod nga nasinati karon tungod sa maong bagyo. Samtang ang Mines and Geosciences Bureau-7 miawhag sab sa mga lokal nga opisyales sa Sugbo, Bohol, Negros Oriental, ug Siquijor nga subayon ang ilang mga geohazard maps gikan sa ilang buhatan aron duna silay giya kun asa ang mga dapit nga kuyaw sa baha ug pagdahili sa yuta diha sa ilang lokalidad.
Ang bagyong Auring gikabalak-ang magbunga og mga pagdahili sa yuta, baha ug pagsuyla sa tubig sa dagat ug makaapektar sa kabaybayonan.
“Our ultimate goal is zero casualty. The geohazard maps can greatly help and guide our officials to conduct appropriate precautionary measures to achieve that,” matud ni Armando L. Malicse, MGB-7 OIC regional director sa gipagawas nilang pamahayag.
Ang Tropical Cyclone Wind Signal (TCWS) No. 1 giisa na sa Visayas nunot sa 30 ngadto 60 kilometros kada oras nga hanging masinati sud sa umaabot nga 36 ka oras.
Ang Philippine Atmospheric Geophysical and Astronomical Services Administration (PAGASA) mipagawas sab og Gale Warning number 7 alas-5 sa hapon kagahapon nga nagpasidaan bahin sa kusog nga hanging mohapak sa Northern, Eastern, ug Southern ingon man Western Luzon. Apil niini ang Northern Mindanao ug Visayas maong gibutang kini sa signal no. 1 kagahapon. —Gabriel Bonjoc, Le Phyllis Antojado/IBM (BANATNEWS)
- Latest