Mayor Labella pabiling mag work-from-home
CEBU, Philippines — Magpadayon gihapon sa iyang work from home si Cebu City Mayor Edgar Labella gumikan kay wa pa siya tugti sa iyang doctor nga mobalik sa opisina bisan ug mi-arang arang na ang iyang kahimtang gumikan sa ear infection.
Suma pa ni Labella nga dili pa matino kun kanus-a siya makabalik sa opisina ilabi na karon nga dunay duha sa iyang staff ang nag-positibo sa COVID-19, ang usa niini maoy regular nga tig-andam sa iyang pagkaon.
Giklaro hinoun sa mayor nga bisan naka-work from home siya, wala niya pasagdi ang iyang importanteng gimbuhaton sama sa pagpadangat sa basic services sa katawhan.
Matud pa niya nga lapad ang iyang komunikasyon sa iyang mga department head hinungdan nga wala mabiyai niini ang mga programa sa siyudad. Human siya nakaistar sa tambalanan sulod sa pipila ka adlaw, gitambagan siya sa iyang doktor nga mas maayo magpuyo lang una sa iyang panimalay aron makabaton og saktong pahuway.
Nasayran nga ang pagka-expose niya sa daghang tawo maoy usa sa nakapa-trigger sa iyang ear infection.
Hinoun tungod sa naangkon niya nga sakit, magbinantayon na siya kanunay ug mobuhat og dugang pamaagi nga makatrabaho gihapon nga dili maapektohan ang iyang panglawas.
Sa nangaging interview, gitataw ni Labella nga duna siyay regular check-up busa dili angayan kahibudngan kun makit-an siya nga mosulod og tambalanan. —MEL (BANATNEWS)
- Latest