Nag-awol nga pulis gipatay
CEBU, Philippines — Patay ang usa ka pulis nga gikatahong gidestino didto sa Mindanao apan nag-absent without official leave (AWOL) sa miaging tuig human kini gipusil sa duha ka wala mailhing mga tawong sakay og motorsiklo alas 3:20 Lunes sa hapon diha sa dalan Abella, Barangay Labangon sa siyudad sa Sugbo.
Ang biktima giila nga si Police Corporal Rodel Demaangay,40, residente sa maong dapit.
Sa inisyal nga imbestigasyon ni Police Staff Sergeant Stephen Sefuesca sa Labangon Police Station, naglingkod ang biktima sa bangko daplin sa dalan nianang tungora.
Kalit lang nga dunay duha ka wala mailhing mga lalaki ang nangabot ug gipaulanan kini og bala sa makadaghang higayon gamit ang kalibre .9mm ug kalibre .45.
Ang biktima nakaangkon og daghang samad pinusilan sa nagkadaiyang parte sa lawas nga maoy hinungdan sa iyang hinanaling kamatayon.
Dugang pa ni Sefuesca nga ang biktima nadestino sa BARMM (Bangsamoro Autonomous Region in Muslim Mindanao) human kini girelibohan gikan sa Cebu City Police Office.
Si Police Captain Jonathan Dela Cerna, hepe sa Labangon Police Station miingon nga ilaha karong susihon ang estorya sa asawa sa biktima nga giingong sukad pa niadtong Septiyembre sa miaging tuig kini wala na mo-report og balik didto sa BARMM.
“Pero i-check pa gyud nato ang status ani niya,”matud pang Dela Cerna.
Padayon pa karon ang gihimong imbestigasyon sa kapolisan aron sa pag-ila sa mga mamumuno ug motibo sa pagpatay sa biktima.— Iris Hazel Mascardo/IBM (BANATNEWS)
- Latest
