City hall sa Toledo mag-full force na
CEBU, Philippines — Ang kagamhanan sa Dakbayan sa Toledo nipahibawo nga full force na ang tanang departamento sa city hall sa siyudad sugod sa sunod buwan.
Ang siyudad dul-an kini sa usa ka tuig nga ubos sa skeletal ang ilang sestema sa city hall gumikan sa pandemic.
Si John Rafols Layan, tigpamaba sa siyudad nagkanayon nga panahon na nga mag-move on sa kasamtangang sitwasyon ug ipatuman na sa kagamhanan sa siyudad ang dugang mga programa inubanan sa pagtuman sa safety ug health protocols.
Nasayran nga sukad nitumaw ang pandemiya 50 porsyento lang sa trabahante ang gipasulod sa tagsa-tagsa nila ka opisina diin ang laing katunga niini gipaubos sa “work from home”.
Ang kagamahan sa Dakbayan sa Toledo adunay 598 ka empleyado.
“Bisan pa man niini, dili gyud nato kalimtan ang pagpatuman sa health protocols”, padayag ni Layan.
Sa maong kalamboan tulin na unya ang pagpadangat sa basic services ngadto sa ilang mga konsituwente.
“Naa pa gyud ang presensiya sa COVID, pero wala nagpasabot nga maapektohan gihapon ang gimbuhaton sa atong kagamahanan. Panahon na nga mag-move on sa kahadlok ug tumanon ang health protocols”, dugang ni Layan. —BDB (BANATNEWS)
- Latest