Pinay OFW gibantayan kun may UK variant

Cebu, Philippines — Dili mominos tulo na ka mga tawo dinhi sa Sugbo ang gibantayan sa Department of Health Central Visayas may kalabutan sa higpit nga pagbantay aron dili mokatap sa Sugbo kining bag-ong variant sa coronavirus.

Gitug-an ni Dr. Mary Jean Loreche, tigpamaba sa DOH-7 nga nahinabi sa mga tigbalita nga dunay usa ka 28-anyos nga babayeng Overseas Filipino Worker nga niabot sa Mactan Cebu International Airport gikan sa Dubai.

Sumala pa ni Loreche, ang maong pasahero niabot sa Sugbo agi sa MCIA adlaw nga Huwebes ug gipaubos dayon sa swab test.

Ang samples niini ipadala sa Philippine Genome Center karon adlaw nga Lunes Enero 25, 2020 aron tan-awon kun nataptan ba kini og coronavirus, ug kun mao man, susihon kun kadto bang UK variant.

Ang maong 28-anyos maoy kinauwahiang nalakip sa talaan sa DOH-7 nga gipaubos sa higpit nga monitoring tungod sa mutated variant sa SARS-CoV-2 virus nga maoy hinungdan sa infection.

Kaning maong coronavirus variant unang na-detect didto sa United Kingdom nga gitawag karon og B-117 nga giingong mas paspas kaayong makatakod.

Gawas sa maong babaye nga gi-monitor sa DOH-7 duna pay laing duha pulos mga lalaki silang gibantayan       karon.

Ang usa 35-anyos gikan sa Amerika ug ang laing usa mao ang 54-anyos gikan gihapon sa Dubai apan silang duha nanukad gikan sa Manila padung dinhi sa Sugbo.

Ang sample sa duha atoa na usab sa PCG alang sa genomic sequencing apan wala pay nadawat nga resulta silang Loreche diha sa DOH-7.

Ang unang kaso sa UK variant dinhi sa nasud nagsugod sa usa ka Pilipinong biyahidor nga negosyante gikan sa Dubai nga sa pagbalik dinhi sa nasud sayo ning buwana nakita nga nataptan kini sa maong bag-ong  variant sa coronavirus.

Gawas sa United Arab Emirates ug UK,  diin nahimutang ang Dubai, duna pay kapin sa 30 ka mga nasud nga temporaryong gi-ban sa Pilipinas nga makaanhi tungod sa kadaghan sa mga kaso didto sa maong bag-ong coronavirus variant. (BANAT NEWS)