CDRRMO sa Talisay pabiling alerto sa mga pag-uwan

Cebu, Philippines — Pabiling alerto ang mga sakop sa city disaster risk reduction and management office CDRRMO sa Dakbayan sa Talisay bisan sa hinay apan sunod-sunod nga pag uwan.

Si Alvin Santillana nagkanayon nga dili kalikayan nga mohumok ang yuta nga maoy hinungdan sa pagdahili niini ilabi na sa kabukiran.

Lakip sa pahimangno ni Santillana sa mga motorista mao ang paglikay sa Manipis road ilabi na kun kanunay nga mag-uwan uwan tungod sa posibleng paghumok sa yuta nga makamugna og landslide. Nasayran kagahapong adlawa nakasinate ug landslide ingon man pagdahili sa mga bato diha sa Manipis road nga miresulta sa temporaryong pagtak-op niini sa mga motorista.

Kahinumduman pipila ka tuig na ang nakalabay dunay motorista nga nakalas diha sa nahisgutang dapit tungod sa pagka-igo sa mga bato. Gidugang ni Santillana nga wala may pagsaka sa tubig sa sapa ug kusog nga hangin sa kadagatan apan mas maayo nga magmabinantayon ilabi na ang mga residenti sa dapit aron malikayan ang disgrasya. (BANAT NEWS)