LPG nibuto, tulo naangol

CEBU, Philippines — Tulo ang angol human nibuto ang tanke sa Liquefied Petroleum Gas (LPG) nga gitestingan diha sa usa ka balay nga gibutangan og tindahan diha sa Deca Homes Phase 3 sa Barangay Dumlog, Dakbayan sa Talisay kagahapon sa udto.

Si Fire Officer 3 Junryl Siaboc sa Talisay City Fire Station niila sa mga naangol mao sila si Aga Silmar, 36; Daniel Gabuya, 16; ug si Niña Macalinao, 38.

Matud pa niya nga tindero sa tindahan ni Arlene Sayco sila si Silmar ug Gabuya samtang si Macalinao ang nipalit kanila og LPG.

Gikatahong ‘gitestingan’ ang tanke sa LPG apan adtong tungora gikatahong nagluto para paniudto ang mga tindero ug diha-diha nibuto ang gamay nga tangke human giingong gidakop ang kalayo gikan sa stove.

Ang tulo nangapaso sa nagkadaiyang parte sa lawas ug tungod sa kakusog sa pagulbo nangabuak ug nangalagpot ang mga paninda sa tindahan ngadto sa gawas sa balay. Si Sayco nagkanayon nga wa gyud sila masayod sa iyang mga sakop kun unsay hinungdan nga nikalit og ulbo ang ilang tindahan.

Hinuon gipasalig niya nga abagahon niini ang galastohan sa tambalanan sa mga naangol.

Ang kabomberohan naghimo pa og imbestigasyon kabahin sa maong hitabo.— IBM (BANATNEWS)