Hangyo sa LGUs gitun-an sa ad ho committee sa Cebu City

Cebu, Philippines — Si Mayor Edgardo Labella sa Dakbayan sa Sugbo nagkanayon nga gitun-an sa ad hoc committee ang hangyo sa ubang Local Government Units ilabi na sa Siyudad sa Talisay nga makasulod ang ilang mga Traditional Public Utility Jeepneys (TPUJ) sa Cebu City.

Matud ni Labella nga angayan kining tun-an tungod kay makita ang kahuot sa dagan sa trapiko sa Siyudad sa Sugbo.

“Kana karon that’s subject of the study of the ad hoc committee kay atong tan-awon nakita bitaw ninyo nga murag nigrabe na sad ang traffic”, ni Labella pa.

Sayo pa, si Konsehal James Anthony Cuenco, chairman sa Cebu City Jeepney Task Force nagkanayon nga ang Talisay City pa lang gihapon ang nisumetir og request aron tugotan ang ilang mga TPUJ nga makasulod sa Cebu City.

Gani niadtong Lunes, si Cuenco nagkanayon nga nagtagbo sila ni Labella ug gituki ang kalamboan sa pagbalik sa mga TPUJs sa dakbayan diin apil sa gituki mao ang proposal nga buksan ang borders sa Cebu City alang sa mga TPUJs nga gikan sa tulo ka Local Government Units nga mao ang Mandaue City, Lapu-Lapu City ug Talisay City.

Nunot usab niining holiday season una nang gihulagway ni Cuenco nga kuwang ang public transportation hinungdan nga nakig-alayon sila og transport companies aron ma-deploy ang ilang extra nga mga modernize jeepney ug buses diha sa kadalanan sa siyudad.

Ug kon maaprobahan, ang 14 ka dugang mga rota nga girekomendar sa Cebu City Jeepney Task Force gihulagway ni Cuenco nga dako kini og tabang alang sa public transportation sa Dakbayan sa Sugbo. ( BANAT NEWS)