Gikasab-an sa apohan, lalaki nilayat sa pangpang
CEBU, Philippines — Usa ka 28-anyos nga lalaki nga giingong adunay kakulian sa pangisip ang grabeng naangol human kini giingong nilayat sa pangpang sa Dakbayan sa Carcar kagahapon sa buntag, Disyembre 20, 2020. Ang maong lalaki ulitawo ug nagpuyo sa Barangay Guadalupe sa maong siyudad.
Matud ni Police Corporal Argie Noel Espinosa sa Carcar City Police Station bag-ohay lang gikasab-an sa apohang babaye ang lalaki ug nangluod kini dayon miadto sa pangpang ug milayat ngadto sa ubos. “Ang rason ngano ni-ambak ang biktima kay gikasab-an daw ni sa iyang lola kay nanumbag sa iyang silingan. Naa man gyud ni siya mental disability, unya dali ra mangluod, mao nilayat,” matud ni Espinosa.
Ang pangpang nga gilayat sa lalaki gibanabanang 20 ka tiil hinungdan nga gituohang nakaangkon kini og grabeng kadaut sa kalawasan ug gidala sa tambalanan human nakuha sa mga rescuers.— IBM (BANATNEWS)
- Latest
