Killers sa abogada lima ka tawo

Cebu, Philippines — Gitan-aw sa Danao City Police Station nga dili moubos sa lima ka mga tawo ang persons of interest sakay sa mga sakyanan nga nalambigit sa pagpusil patay sa abogadong si Baby Maria Concepcion Landero-Ole kaniadtong Huwebes, Disyembre 17.

Si Police Major Maria Theresa Macatangay, hepe sa Danao City Police Station nagkanayon nga dili moubos sa lima ka mga tawo ang sakay sa mga sakyanan nga nagsunod kang Ole gikan sa korte hangtod sa highway.

"Naa tay mga naki-an sa atong mga CCTV (closed-circuit television) footages nga mga vehicles gasunod, ga-tail sa sakyanan nga gi-drayban ni Atty. Ole gikan sa court padung sa highway," matud ni Macatangay.

Basi sa nakuha nga CCTV footages, giingong tulo ka sakyanan nga gilangkuban sa usa ka four-wheeled nga sakyanan ug duha ka motorsiklo ang nagsunod sa abogada.

Giasoy ni Macatangay nga i-rekomenda nila ang paghimo og Special Investigation Task Group (SITG) sa Cebu Provincial Police Office (CPPO) aron magsusi sa pagpatay ni Ole.

Dugang pa niya nga gitan-aw nila ang posibilidad kung ang pagpatay sa abogada dunay kalabutan pagpatay sab sa bana niini nga matud pang Macatangay gidudahang drug lord niadtong Mayo ning tuiga.

Si Ole, residente sa Barangay Taboc sa maong dakbayan, gipusil sa duha ka mga wa mailhing mamumuno samtang nagmaneho sa iyang puti nga pick-up subay sa national highway sa Barangay Looc alas 2:50 sa hapon  niadtong Huwebes.

Ang mga saksi nagkanayon nga gipusil sa mga suspetsado ang biktima sa makadaghang higayon ug daling niikyas padulong sa habagatan.

Wala pay usa ka bulan sa dihang gipatay sab si Atty. Joey Luis Wee sa gawas sa iyang opisina sa Barangay Kasambagan, Cebu City.

Gikondena sa Integrated Bar of the Philippines (IBP) Cebu Chapter ang pagpatay sa duha ka mga abogado ug mihulagway nga kini mga pagpatay sa ilang mga miyembro dili lang pakutlo sa kinabuhi kondili pag-atake kini sa legal nga propesyon ug sa Rule of Law.

Si Archbishop Jose Palma sa Archdiocese of Cebu mipadayag sa iyang kasubo niining pagpamatay sa mga abogado.Gipahinumdoman niya ang mga tawong naghimo niini ug kadtong nagpalnong maghimo og krimen nga dili sila maoy tagiya sa kinabuhi sa tawo ug dili maayong ibutang ang balaod sa ilang mga kamot.

Ang arsobispo, nipadangat usab sa iyang pahasubo ngadto sa mga pamilya sa nakalas tungod sa biktima sa mga pagpamusil.—Mae Fhel Gom-os  Rowena D. Capistrano ( BANAT NEWS)