Environmentalist gisupak ang pagbutang og incinerator
CEBU, Philippines — Nagprotesta kagahapon atubangan sa Cebu City Hall ang pipila ka grupo sa mga environmentalist ug nanawagan sila sa kagamhaman sa siyudad nga dili idayon ang gi-propose sa usa ka pribadong kompanya nga magbutang og waste-to-energy (WTE) project sa Barangay Binaliw.
Segun sa statement sa No Burn Pilipinas, gihulagway niini nga risgo kaayo ang maong proposal ngadto sa panglawas sa mga tawo ug makaapekto usab kini sa ilang panginabuhian.
Matud pa sa maong grupo nga dili gyud sustainable ang pagbutang og incinerator diin sunogon ang mga basura.
Nasayran nga gisaulog nationwide kagahapon ang National Day of Action on Climate Energy ug ang maong proposal maoy usa sa ilang gituki.
Apan ang city administrator nga si Atty. Floro Casas Jr. nipadayag nga wala pa’y final nga hukom ang maong proyekto sanglit naa pa man kini sa negosasyon ug wala pa’y partikular nga lugar ang napili alang niini.
Gitataw ni Casas nga padayon ang pagtoon niini sa mga expert ug ang resulta niini maoy basehan sa ilang hukom.
Dugang pa niya nga dunay mga bag-ong teknolohiya nga giingong dili makahatag og kadaot sa kalikopan ug usa kini sa ilang gilantaw.
“We respect their opinion pero ang experts gyud ang mo-decide if this type of facility or kining waste disposal system, is sustainable or not,” suma pa ni Casas.
Matud pa niya nga dunay mga consultant ang siyudad nga maoy mo-evaluate sa proposal. —MEL (BANAT NEWS)
- Latest