Taxi driver miuli sa cellphone sa pasahero
CEBU, Philippines — Honest taxi driver nakadawat og mga pagdayeg sa mga netizen human miuli sa mahalong cellphone nga nakalimtan sa iyang pasahero.
Si Cirilo Umambac nga taga Barangay Basak San Nicolas miuli sa cellphone sa iyang pasahero nga si Maria Ellen May Daclan nga taga Tuyan, Siyudad sa Naga.
Si Umambac nga drayber sa Rolac Taxi nakapasakay ni Daclan gikan sa Naga ug nagpahatud kini diha sa mall sa Barangay Lawaan 1, Dakbayan sa Talisay.
Wa makabantay ang drayber nga sa pagkanaog sa pasahero nahabilin diay ang iyang cellphone.
Dihang nasuta ni Umambac nga dunay nahabilin nga cellphone dali kini niyang gidala sa buhatan sa City of Talisay-Traffic Operation Development Authority (CT-TODA) aron iturn-over.
Wa sab magdugay gikuha kini sa tag-iya nga nagpasalamat sa matinud-anon nga drayber.
Si Jonathan Tumulak, traffic czar sa Siyudad maoy nisaksi sa pag-turn over sa cellphone ngadto sa tag-iya niini. —MEL (BANATNEWS)
- Latest