Lalaki gi-salvage

CEBU, Philippines — Usa ka lalaking gibinaklid og gapos sa luyo ang nakit-ang wala nay kinabuhi diha sa hilit nga bahin sa Sitio Nangka, Barangay Garing sa bukiran nga bahin sa Lungsod sa Consolacion kagahapon sa buntag.

Ang lalaki nga gigapos ug gibaatan og duct tape naila nga si Vincent Cañada, alyas Shiote, 29, taga Sitio Katapusan, Lungsod sa Sibonga ug temporaryo nagpuyo sa may Barangay Lorega-San Miguel  sa Dakbayan sa Sugbo.

Ang patay nga lawas nadiskubrehan alas otso sa buntag  ug nagsugod na kini og kadugta.

Sumala pa nga nagtrabaho kini kaniadto sa city hall sa Talisay ug ning bag-o nagtrabaho na kini sa usa ka bangko.

Ang biktima giila sa ig-agaw niini ug sa kauban niya sa trabaho.

Sa pagsusi sa mga sakop sa Scene of the Crime Operatives-7, gikatahong adunay nakuhang siyam ka paketeng gituohang shabu sa bulsa sa shorts niini. Ang kapulisan ni request ug autopsy sa patay nga lawas aron pagsuta kun unsay gikamatyan niini. Wa pa sab matino kun diha gipatay o gilabay ra sa maong dapit si Cañada.

Blangko pa usab ang kapulisan sa motibo sa pagpatay ni Cañada apan usa sa gipasubay sa hepe sa kapulisan sa lungsod Police Major Verniño Noserale mao ang kalambigitan sa illegal nga drugas nunot sa nakuhang mga pakete sa shorts sa biktima, ug lakip na ang uban pang anggulo.— IBM (BANATNEWS)