Mga opisyales sa PCL-Cebu mi-resign
CEBU, Philippines — Niluwat sa katungdanan ang tanan opisyal ug mga kawani sa Philippine Councilors League (PCL) Cebu Provincial Federation aron pagtuman sa gikasabutan nga pagbahin sa termino sa laing grupo.
Ang pangulo sa PCL Cebu Chapter ug Konsehal Francis Edward Salimbangon sa Tabogon niduso sa ilang resignation letter nga pinetsahan og Nobiyembre 11, 2020 ngadto kang PCL national chairman Danny Dayanghirang, PCL national president Jose Nelson Sala ug Gob. Gwendolyn Garcia.
“I was raised by a great man. Importante jud kaayo ang honor and dignity especially sa Salimbangon family,” matud ni Salimbangon.
Hinoon hangtud pa sa Nobiyembre 30 ang termino ni Salimbangon isip sakop sa Provincial Board dungan sa iyang kaubanang opisyal ug mga kawani sa PCL Cebu Province Chapter.
“We are a honorable team, dli ta gusto mapareha ni Cayetano,” sumala pa ni Salimbangon.
Si Salimbangon nitakda og special election karong Disyembre 1 aron pormal nga mopuli ang grupo ni Konsehal Caroline Bacaltos sa Sibonga.
Nangayo og ayuda si Salimbangon sa PCL National alang sa pagpahigayon sa eleksiyon.
Sa nahabiling mga adlaw, gipahibawo ni Salimbangon nga ang PCL Cebu Chapter nanghatag og mga bugas, face mask ug face shields sa nagkalainlaing lungsod ug siyudad sa lalawigan.
Gipasalig ni Salimbangon ang suporta sa iyang grupo sa bag-ong mga opisyal.
Atol sa eleksiyon sa PCL niadtong Septiyembre 20, 2019, walay kaatbang ang grupo ni Salimbangon tungod sa panagsabot sa grupo ni Bacaltos kinsa kaalyado ra sa politika.
Si Salimbangon, anak ni kanhi kongresista Benhur Salimbangon, sakop sa National Unity Party samtang si Bacaltos sakop sa Nacionalista Party ug parehong kaalyado ni Gob. Gwendolyn Garcia sa Partido Demokratiko Pilipino-Lakas ng Bayan (PDP-Laban) ug 1Cebu Party. –IBM (BANATNEWS)
- Latest
