Negosyante gipusil sud sa sakyanan

CEBU, Philippines — Patay ang usa ka negosyante human kini gipaulanan og bala sa mga armadong lalaki samtang ang biktima luwan kini sa iyang sakyanan kauban sa wala mailhi nga babaye.

Ang pagpamusil nahitabo diha sa Sitio Laray sa Barangay Pitogo sa Lungsod sa Consolacion alas-9  pasado ang takna sa miaging Biyernes sa  gabii. Si  Police Major Verniño Noserale, hepe sa Consolacion Police Station miila sa biktima nga mao si Rey Godinez Yuson, 39, molupyo sa Sitio Fatima, Barangay Jubay sa Lungsod sa Liloan.

Matud pa ni Noserale naa na sa sulod compound sa usa ka motel sa maong ugar ang sakyanan sa biktima kuyog sa wala pa hiilhing babaye sa dihang nahiabot ang wala hiilhing lalaking nagsakay og motorsiklo nga may giangkas usab nga usa ka babaye.

Dugang pa sa kapolisan nga mi-parking ang motorsiklo ug nagdali sa pagkanaug ang nagsakay nga lalaki ug diretsong giduol ang biktima nga didto pa sa sulod sa iyang sakyanan dayong pusil sa ulo niini ug ubang bahin sa iyang kalawasan.

Human sa maong pagpamusil daling mibalik sa motorsiklo ang lalaki. Apan ang wala mailhing babayeng kauban sa biktima nikanaog sab sa sakyanan ug miangkas sa motorsiklo sa gunman kauban sa babayeng angkas niini ug daling mipalayo sa lugar.

Si Noserale miingon nga usa sa mga anggulo karon nga ilang gisusi mao ang pagpanulis ug managkunsabo ang babayeng kuyog sa biktima ug sa babaye ug lalaing nagmotor.

Ang pamilya sa biktima matud pang Noserale mibutyag nga nahanaw na ang sling bag nga butanganan og kwarta nga kanunay dad-on sa namatay.

Gidala pa unta ang biktima sa labing duol nga tambalanan apan gideklarar kini sa mga doktor nga dead on arrival. /IBM (BANATNEWS)