Labella wa pa motando sa hangyo sa Talisay

Cebu, Philippines — Wa pa mohatag og hingpit nga tubag si Cebu City Mayor Edgardo Labella sa suwat nga gipadala ni Talisay City Mayor Gerald Anthony “Samsam” Gullas nga naghangyo nga tugutan ang mga jeep de pasaheroan nga dunay rota nga Talisay-Cebu City nga makasulod sa hurisdiksiyon sa Cebu City.

Suma pa ni Mayor Labella nga iya una nga gi-refer ngadto sa Cebu City Transportation Office ang maong hangyo aron mapangayuan og komento labot niini.

Hinoon gisugyot ni Labella nga makig-meeting siya tali ni Mayor Gullas ug bukas usab siya sa panagtigum tali sa kagamhanan sa Dakbayan sa Mandaue og Lapu-lapu tungod kay interconnected man ang maong mga syudad.

“Kay puro man ta interconnected, Mandaue, Lapu-Lapu, Talisay so wa man mi problema kay nagkasabot man ming tanan”, ni Mayor Labella pa.

Samtang midangat ngadto ni Mayor Edgar Labella ang yangongo sa pipila ka commuters nga dugay kaayo makasakay ug nipadayag nga nihit gyud ang ilang masakyan.

Subay niini gipadayag sa mayor nga gipa-standby na niya daan ang pipila ka bus companies nga nipadayag og interest nga mobiyahe sa pipila ka mga rota sa Dakbayan sa Sugbo.

Hinuon aminado si Labella nga gamay lang ang Ceres Bus nga nibiyahe sa miaging adlaw gumikan kay gipatambong ang pipila ka mga drayber niini og seminar. Apan wa pa mohatag og go signal si Labella nga mahimo nang mobyahe ang ubang bus companies sanglit padayon pa ang himoon nga obserbasyon  ilabi na nga posibleng  makabiyahe na sulod karong buwana ang  tradisyonal nga mga PUJ nga nakapasar sa lapad nga ebalwasyon.

Usa ka commuter nga ginganlan og Gina Fray ang nahinabi sa Banat News ug nipadayag kini nga maproblema gyud siya sa pagsakay og inig-uli niya gikan sa trabaho.

“Paet jud kaayo amo kahimtang uy, dili gyud igo ang gidaghanon sa mga bus, “suma pa niya. (BANAT NEWS)