Mandaue makigtagbo sa operator sa Ceres tungod sa mga aksidente
CEBU, Philippines — Pakigtagbuan sa mga opisyal sa kagamhanan sa Dakbayan sa Mandaue ang kadagkuan sa Vallacar Transit nga maoy operator sa Ceres Bus Liner human sa nahitabong sunod sunod nga aksidente nga mikalas na og kinabuhi.
Ang tigum nga gitakda karong adlawa Nobyiembre 5, 2020 gitumong aron ipadangat ang mga reklamo usab sa katawhan nga pagpakanaug og pagpasakay og pasahero sa maong bus sa dili designated bus stop.
Si Atty John Eddu Ibañaez nga maoy executive secretary ni Mayor Jonas Cortes miingon nga sukad pa sa Septiyembre 2020, sa matag semana ang Traffic Enforcement Agency of Mandaue (TEAM) makatala gyud og vehicular accident nga nalambigit ang Ceres Bus.
Gitataw hinuon niya nga dili pa siya makahatag sa tukma detalye sa maong mga aksidente sanglit nagpadayon pa man ang gihimong imbestigasyon.
"Dili man sad pasabot nga na- involve ang Ceres sa aksidente, mao na gayod kini ang sad-an," ni Atty Ibañez pa.
Si Ibañez miingon nga lakip usab sa ilang tukion ang pag-overtake sa mga Ceres bus driver og mokawat na pag-okopar sa bike lane.
Nasayran mokabat sa 150 ka mga Ceres Bus maoy nagbiyahe paingon sa Lapu-Lapu ug amihanang bahin sa lalawigan ang molabay sa kadalanan sa Dakbayan sa Mandaue. /MEL (BANATNEWS)
- Latest