Sidewalk Vendors hayan makabalik sa pagpaninda

CEBU, Philippines — Gipasalig ni Cebu City Mayor Edgar Labella nga dili gyud pasagdan ang mga sidewalk vendors ug ilaha kini nga tabangan nga makabalik sa ilang panginabuhian.

Suma pa niya nga nangita karon og haom nga formula ang ad hoc committee sa higayon nga makabalik sila sa pagpamaligya sa kadalanan. Nasayran nga taod-taod na nga nawad-an og panginabuhian ang sidewalk vendors tungod sa pandemya. Gipaneguro hinoun sa mayor nga mahatagan gyud og balanse nga pagtuon aron makab-ot ang desisyon nga mohaom sa “general welfare”.

Hinuon gitataw sa mayor nga dili kini magkasumpaki sa nagpadayon nila nga clearing operation sa mga kadalanan ilabi na karon nga dunay kamandoan ang Department of Interior and Local Government (DILG) nga ipadayon ang paghawan sa kadalanan.

Si Konsehal Dave Tumulak mao ang gitahasan ni Mayor Labella nga mangulo sa maong task force.

Sayo pa, gipaduso sa kagamhanan ang nagkadaiyang grupo sa sidewalk vendors sa ilang mga proposal.

Pipila niini ang nipasalig nga hugot nila nga tumanon ang safety protocols isip kooperasyon sa kampanya aron paglikay sa pagkuyanap sa COVID19. Nasayran adunay 1,200 ka sidewalk vendors sa nagkadaiyang dapit sa Dakbayan sa Sugbo. /MEL (BANATNEWS)