Mga iro sa mga libudsuroy giatiman sa DVMF
CEBU, Philippines — Ang Division sa Department in Veterinary Medicine and Fisheries (DVMF) sa Dakbayan sa Sugbo miklaro nga giatiman nila ang mga na-rescue nga mga iro sa kadalanan nga gipanag-iya niadtong mga libud-suroy nga gipanghipos sa kagamhanan.
Mao kini ang tubag sa ilang buhatan sa komento sa mga netizens nga nangutana bahin sa mga binuhing iro sa mga libud-suroy nga gihipos.
Suma pa sa in-charge sa Animal Health Division sa DVMF nga si Dr. Jessica Maribojoc nga pipila sa mga iro sa mga libud-suroy ilaha sab gitugyan kanila.
Samtang ang uban nga gipamiyaan gyud sa mga tag-iya nga nanagan atol sa operasyon ilaha gyung gikuha aron atimanon ug gipangitaan nila karon og mga tawong gustong mosagop.
Ang pagsagop og mga iro maoy usa sa pamaagi sa maminosan ang mga libudsuroy nga iro sa kadalanan.
Sa pagkakaron, dunay 70 ka mga iro sa ilang buhatan ug nag-agi gyud kini og regular check-up.
“Mohangyo ta sa katawhan nga kun magbuhi ta og mga iro, ato gyud sila hatagan og saktong pag-atiman,” suma pa ni Maribojoc.
Tungod sa community quarantine, gilusad sa DVMF ang free delivery alang sa mga sagopon nga iro ug ipaagi nila og online ang aplikasyon alang sa gusto nga mosagop niini. /IBM (BANATNEWS)
- Latest
